MWENGE WA UHURU

NI kubwa yake thamani, mwenge wetu wa uhuru

Yapasa tuuthamini, umeangaza uhuru

Mwenge wetu wa amani, kila mtu yupo huru

Mwenge ni kielelezo cha Taifa letu huru

Mwenge ulitoa giza, na nuru ukaangaza

kutazama wapendeza, ndugu zangu nawajuza

Hakika unapendeza, si dhambi kuutangaza,

Mwenge ni kielelezo cha Taifa letu huru

Uliwashwa mlimani, nchi nzima ikapoa

Naeleza siutani, mwenge tulifurahia

Waliona majirani, Uganda na Kenya pia

Mwenge ni kielelezo cha Taifa letu huru

Udumu yote miaka, mwenge wetu wa thamani

Twajivunia hakika, mwenge wetu wa amani

Uliondoa mashaka, hata kule mipakani

Mwenge ni kielelezo cha Taifa letu huru

Tumaini ulitoa, kwa nchi ya Tanzania,

Dhuluma uliondoa, hata na unyonge pia

Mabaya ulikemea, na rushwa ukakemea

Mwenge ni kielelezo cha Taifa letu huru

Mwishoni naelekea, mengi nimeelezea

Shairi ninalitua, masikani narejea

Mwenge nimeelezea, ujumbe nimeutoa

Mwenge ni kielelezo cha Taifa letu huru

 Mtunzi ni SirDody Dody - Kilimanjaro, 0762396923 au 0675654955