MSIGWA AZINDUA RASMI TAMASHA LA 42 LA SANAA BAGAMOYO

Na Mwandishi Wetu, Pwani

KATIBU Mkuu wa Wizara ya Utamaduni Sanaa na Michezo, Gerson Msigwa amefungua rasmi Tamasha la 42 la Kimataifa la Sanaa na Utamaduni Bagamoyo mkoani Pwani.

Tamasha hilo limehudhuriwa na wananchi na wadau mbalimbali kutoka ndani na nje ya nchi akieleza kuwa Utamaduni na Sanaa ni Sekta zenye  umuhimu mkubwa katika kuleta maendeleo na kukuza ajira hapa nchini.

Katibu Mkuu Msigwa amesema hayo usiku wa Oktoba 26, 2023 wakati akifungua rasmi tamasha hilo linaloendelea katika viwanja vya Taasisi ya Sanaa na Utamaduni Bagamoyo (TaSUBa).

     Katibu Mkuu wa Wizara ya Utamaduni Sanaa na Michezo, Gerson Msigwa

"Rais wa Jamhuri ya Muungano wa Tanzania Dkt. Samia Suluhu Hassan anatambua kwamba eneo la Sanaa katika nchi yetu ni la kimkakati, ni lazima tulitumie kimkakati. Naomba sana vijana wenye vipaji wasizuiliwe kufanya Sanaa, huku nako kuna ajira" amesisitiza Msigwa.

Hafla ya ufunguzi wa Tamasha hilo ambalo linafanyika kwa siku tatu kuanzia Oktoba 26 - 28, 2023 katika Taasisi ya Sanaa na Utamaduni Bagamoyo (TaSUBA) limehudhuriwa na viongozi mbalimbali akiwemo Mwenyekiti wa Bodi ya taasisi hiyo Bw. George Yambesi, Mkurugenzi wa Maendeleo ya Sanaa Dkt. Emmanuel Ishengoma, viongozi na wakazi wa Wilaya ya Bagamoyo.

Baadhi ya Wasanii na vikundi vilivyofungua tamasha hilo ni pamoja na ; Wamwiduka Band, Worrious from the East,  msanii Vitalis Maembe, na wengine  wengi.