MADIWANI WAJADILI HOJA RIPOTI YA CAG, RC ATIA NENO MIRADI UJENZI WA MASOKO YA SAMAKI

Na Boniface Gideon, Tanga

MKAGUZI Mkuu wa nje wa Hesabu za Serikali mkoa  wa Tanga  amebaini  uwepo  wa dosari namna ya uendeshaji wa miradi ya masoko ya samaki huku  miradi hiyo ikishindwa kutoa faida licha ya Serikali kuwekeza fedha nyingi kupitia sekta hiyo ya Uvuvi.

Aidha Halmashauri hiyo imeonekana  kupunguza kiwango cha hoja zilizoibuliwa na CAG kwa Mwaka wa fedha 2021/2022  kutoka  hoja  44  hadi  kufikia  hoja 41 huku hoja nyingi  zikionekana kujirudia kila mwaka hali  iliyoonekana kuwakasirisha viongozi  wengi wa Halmashauri hiyo hususani  Madiwani  na Mkuu wa mkoa huo Waziri  Kindamba.

Hoja hizo za CAG ziliibuliwa Juni, 19  wakati wa kikao cha Baraza la Madiwani  kilichoketi kwamujibu wa Sheria kujadili  Ripoti ya Mkaguzi na Mdhibiti  Mkuu wa Hesabu  za  Serikali (CAG).

Kikao hicho kiliongozwa na Mwenyekiti  wake ambaye pia ni mkuu wa mkoa  wa Tanga Waziri Kindamba na kuchambua  hoja 41 ambazo CAG amezitolea  kwenye Ripoti yake ya mwaka wa fedha 2021/2022 na zinatakiwa zifanyiwe kazi  kabla ya mwaka wa fedha kufungwa juni 30 mwaka  huu.

Katika hoja za CAG ameonesha  kutokuridhishwa na namna Halmashauri hiyo inavyoendesha na kusimamia  masoko ya samaki huku mapato yatokanayo na sekta ya uvuvi  yakionekana kupotea kutokana na isimamizi mbovu.

Masoko hayo ni Mchukuuni,Tongoni na Deepsea huku soko  kuu la samaki Kisosora likinyooshewa vidole na Madiwani  kufanyiwa ukarabati ili kudhibiti  upotevu  wa mapato.

Katika Ripoti hiyo mkaguzi ameonesha  kutokufurahishwa na mazingira mabovu ya kufanyia biashara katika soko la Deepsea huku kwakiwango kikubwa masoko mengine  kutokufanya kazi  kwa ufanisi.

Akijibu hoja hiyo ya masoko ya Samaki , Mkurugenzi  wa Jiji la Tanga  Spora  Liana  amesema;

‘’Tumetenga Mil.300 kwaajili ya  ukarabati na ujenzi wa vizimba vya kuuzia samaki soko la Deepsea, kuhusu  masoko mengine ya Tongoni na  Mchukuuni yapo kwenye mradi wa  Botnar foundation lakini pia wavuvi  tuliwanunulia Boti kwaajili  ya  kuwahamasisha kuanza kufanya kazi ya uvuvi’’ amesisitiza Liana

Hoja hiyo imeonekana kumkasirisisha  Mkuu  wa  Mkoa Tanga Waziri  Kindamba na kutoa tamko. 

‘’Tanga  jiji  ndio kioo cha mkoa wa  Tanga na mikoa ya Kanda  ya Kaskazini Mashariki, sisi tuna ukanda mzuri wa Bahari na ndio mgodi wetu wa madini tunaoutegemea kwenye vitu vingi  ikiwamo kitoweo cha Samaki aina mbalimbali ambao hawapatikani  katika mikoa ya Bara.

"Mkurugenzi hakikisha unawapeleka Wataalamu wako hata huko Pemba  waende wakajifunze uchumi wa bluu ili tuende sawa kwapamoja, tunahitaji  uchumi wetu ukue hasa kupitia bahari yetu ambayo wengine  wanaililia ‘’ amesema Waziri Kindamba

Miradi mingine ambayo imetiliwa shaka ni kuchelewa ujenzi wa jengo la stendi  mabasi kange, mfumo mbovu wa  ukusanyaji  mapato eneo la mapumziko  forodhani.

Pia fremu  za  maduka ya biashara za  stendi  ya Pongwe ambayo ina fremu za maduka 88 lakini mfumo wa mapato  hauonyeshi kulipiwa ambapo hadi sasa  kwa mujibu wa ofisa ya biashara wa Halmashauri  hiyo Lusia  Malando ni  Sh 400,000 kati  ya Milioni 3 pekee ndizo  zimelipiwa.

Amesema ni kinyume na makubaliano  kati ya wanyabiashara  na halmashauri  kutokana na kuwa fremu hizo  hazikujengwa na halmashauri  bali  Wafanyabiashara kwa makubaliano  maalumu.