HOSPITALI YA TUMBI, QATAR CHARITY ZATOA HUDUMA YA MACHO BURE KWA WANANCHI

 

Na Gustafu Haule, Pwani

HOSPITALI ya Rufa ya Tumbi iliyopo Kibaha mkoani Pwani kwa kushirikiana na Taasisi ya Qatar Charity imetoa huduma ya upimaji na upasuaji wa macho bure Kwa wananchi zaidi ya 1000 waishio katika maeneo mbalimbali ya mkoa huo.

Huduma hiyo imeanza kutolewa Novemba 15 mwaka huu na kumalizika leo Novemba 18 ambapo katika huduma hiyo wananchi wamepimwa macho na yeyote anayebainika kuwa na tatizo hupata dawa na wengine kufanyiwa upasuaji bure .

Daktari Bingwa wa Macho katika hospitali hiyo Dr.Matthew Yinza, amesema kuwa toka wameanza kutoa huduma hiyo Novemba 15 imekuwa na mwitikio mkubwa wa wananchi kwani mpaka Sasa zaidi ya wananchi 1000 wamejitokeza na kupata huduma.

Nyinza, amesema kuwa mwananchi anayepimwa na kugundulika na ugonjwa wa macho anapata huduma kulingana na hali yake jinsi ilivyo kwani wapo ambayo wanapata miwani,dawa na wengine hufanyiwa upasuaji huku akisema huduma zote zinatolewa bure.

"Hospitali yetu ya Rufaa hapa Tumbi kitengo cha macho tumeona tuwasaidie wananchi kwa kuwapa huduma bure ya upimaji macho ambayo tumeanza Novemba 15 mwezi huu lakini mpaka sasa mhamko ni mkubwa kwani idadi kubwa ya wananchi wamejitokeza na huduma wamepata bure,"amesema Nyinza.

Nyinza,ameongeza kuwa mpaka kufikia Novemba 17 jumla ya wananchi 40 wamefanyiwa upasuaji bure na kwamba hatahivyo katika upimaji huo matatizo makubwa yaliyogundulika ni Mtoto wa Jicho pamoja na uoni hafifu.

Kwa upande wake Mratibu wa macho mkoa wa Pwani Dr .Eligreater Mnzava,amesema kuwa wameamua kutoa huduma hiyo hospitalini hapo baada ya kuona tatizo  la macho linazidi kuwa kubwa katika jamii.

Mnzava ,amesema kuwa waliamua kuweka kambi ya siku nne katika hospitali ya Rufaa Tumbi kwakuwa ipo katikati na ipo katika barabara kubwa ya Morogoro ambapo wahitaji wa huduma hiyo ni kubwa.

Aidha, Mnzava amesema huduma hizo zinatolewa bure chini ya ufadhili wa Taasisi ya  Qatar Charity ambayo imekubali kushirikiana na hospitali ya Tumbi katika utoaji wa huduma hiyo ambayo itakuwa endelevu katika maeneo mengine ya mkoa wa Pwani.

"Nichukue nafasi hii kuwashukuru wenzetu wa Qatar Charity kwa kukubali kushirikiana nasi kutoa huduma hii ya macho hapa hospitalini kwetu Tumbi kwahiyo niwaombe wananchi wajitokeze Kwa wingi kutumia fursa hii Kwa ajili ya kufanyiwa uchunguzi wa macho,"amesema Mnzava.

Nao baadhi ya wananchi waliojitokeza kupata huduma hiyo akiwemo Hawa Mruma ,imeishukuru hospitali ya Rufaa ya Tumbi pamoja na wafadhili hai kwa kutoa huduma hiyo bure kwani imekuwa na msaada mkubwa kwao.

Mruma,amewaomba wafadhili wengine kuendelea kujitokeza kwakuwa mahitaji ya wananchi bado ni makubwa hasa katika matatizo ya kiafya ambapo amesema kuwa katika huduma hiyo amepata miwani na dawa bure.

Nae Abdallah Juma,amesema kuwa amekuwa akisumbuliwa na macho miaka mingi lakini hakujua tatizo lakini baada ya hospitali ya Tumbi kutoa huduma ya upimaji bure kumemfanya kujua tatizo la macho yake na hivyo kupata huduma ya miwani na dawa ambapo ameushukuru uongozi wa hospitali ya Tumbi kwa kutoa huduma hiyo.