KAMISHNA KUJI AKAGUA BARABARA HIFADHI YA TAIFA ARUSHA, AIPONGEZA KAMPUNI YA TIL

Na Mwandishi wetu, Arusha

 

KAMISHNA wa Uhifadhi wa Hifadhi za Taifa  (TANAPA), Nassoro Juma Kuji,  ametembelea na kufanya ukaguzi wa Mradi wa Ukarabati mkubwa wa barabara kutoka lango la Ngongongare, Momella mpaka lango la Nasula.

Barabara hiyo ina urefu wa Kilomita 16 inayotekelezwa katika Hifadhi ya Taifa Arusha na Kampuni tanzu ya TANAPA Investment Limited (TIL).

 

Akikagua Mradi huo Agasti, 23, 2024 ambao ni mhimili mkubwa kwa utalii katika Hifadhi hiyo, Kamishna Kuji ameridhishwa na kiwango kizuri cha mradi huo sambamba na hatua ya ukamilishaji iliyofikiwa.

Ameipongeza Kampuni ya TIL kwa kuanza utekelezaji wa mradi huo ndani ya Shirika kwa kiwango cha ubora unaokubalika na Wakala wa Barabara Tanzania (TANROAD).

 

“ Nimeridhishwa na kazi hii ambayo imefanywa na TIL. Hii ni Hifadhi ya kwanza kunufaika na miradi iliyopangwa kutekelezwa na kampuni yetu.

" Ukamilishwaji wa barabara hii utachochea kwa kiasi kikubwa ongezeko la watalii na mapato na hivyo kutimiza malengo ya Ilani ya Chama Tawala ya kufikia watalii milioni 5 na mapato ya Dola za Kimarekani bilioni 6 ifikapo 2025 ”alisema Kamishna Kuji.

 

Msimamizi mkuu wa TIL  Mhandisi Dkt. Richard Matolo, amesisitiza kuwa Kampuni imejizatiti vya kutosha katika kuboresha miundombinu ya Shirika kwa viwango vinavyokubalika.

 

“Huu ni mradi wetu wa kwanza ndani ya TANAPA, tumeanza hapa, na tunatarajia kukamilisha ndani ya siku tano kwa kuzingatia ubora wa hali ya juu. 

"Baada ya hapa, tutaelekea Hifadhi ya Taifa Serengeti ambako tutaanza na barabara ya Golini - Naabi mpaka Seronera yenye urefu wa Kilomita 68, na baadaye kuendelea na barabara zingine kuhakikisha kuwa Serengeti inaendelea kuwa Hifadhi Bora barani Afrika ”alisema Dkt. Matolo.

 

Kamishna Msaidizi wa Uhifadhi, Eva Mallya ambaye ni Mkuu wa Hifadhi ya Taifa Arusha amelishukuru shirika kwa kuwezesha uboreshaji wa miundombinu ya barabara hifadhini.

Amesema kuwa itapelekea watalii hifadhini kuongezeka kwakuwa miundombinu yake inakuwa rafiki kwa magari makubwa na hata yale madogo na kuahidi kuendelea kusimamia matumizi sahihi ya barabara hizo ili kutimiza adhma ya serikali ya kufanya maboresho hayo.

 

Ukarabati wa barabara hiyo yenye urefu wa kilomita 16 kwa kiwango cha Changarawe umegharimu kiasi cha Tsh. Millioni 411. ‎