WAADVENTISTA WASABATO WAOMBWA KUWAWEZESHA KIELIMU, MAHITAJI WATU WENYE ULEMAVU

>>Waliomba kanisa kutafsiri vitabu ikiwemo lesoni kwa maandishi ya Nukta Nundu

>>Wahimiza yanapojengwa makanisa kuwepo na miundombinu rafiki kwa walemavu

>>Wenye ulemavu walipongeza kanisa la Nyamongo Kati kuwajengea miundombinu mizuri ya vyoo

Na Dinna Maningo, Tarime

WAADVENTISTA Wasabato nchini, wameombwa kuwasomesha watu wenye ulemavu wa viungo ili wapate ujuzi wa kuwawezesha kujitegemea pamoja na kutatua changamoto zinazowakabili.

Ombi hilo limetolewa na Bhoke Orindo mwenye ulemavu wa macho ambaye ni Katibu wa idara ya watu wenye ulemavu wa viungo katika kanisa la Nyamongo Kati, wilaya ya Tarime, mkoani Mara wakati akihudumu huduma kuu iliyoendeshwa na watu wenye ulemavu wa viungo iliyofanyika jumamosi ya wiki iliyopita katika kanisa hilo.

Amesema kuwa makanisa mengi hayana miundombinu rafiki zikiwemo ngazi zinazowapa usumbufu wakati wa kuingia ndani ya kanisa kuabudu, mimbari isiyo rafiki pamoja na vyoo visivyo rafiki kwao huku wakilipongeza kanisa la Nyamongo kati kujenga vyoo kwaajili ya  watu wenye ulemavu.

Ameomba watu wenye uhitaji maalum wapewe nafasi za kuhudumu katika ibada mbalimbali ikiwemo shule ya sabato, huduma kuu, mahubiri, semina zitolewe za kuelimisha watu kutowaficha ndani wenye ulemavu, kanisa litenge bajeti kwa ajili ya watu wenye ulemavu ili watekeleze majukumu yao ndani ya kanisa.

“ Tuna idara ya watu wenye ulemavu wa viungo kanisani , tunaomba iwezeshwe ili kutekeleza majukumu yake, walemavu tupewe nafasi za kuhudumu ndani ya kanisa kama walivyo watu wengine .Walemavu wanashindwa kutekeleza majukumu yao ndani ya kanisa kwakuwa hawajapewa semina.

‘’ Kanisa litenge bajeti  kusaidia watu wenye ulemavu, Jimbo la Mara lianzishe makambi ya watu wenye ulemavu,watu wenye mahitaji maalumu wasomeshwe shule na vyuo maana wengi wameshindwa kusoma kwakuwa hawana uwezo wa kwenda shule kutokana na ulemavu walionao.

Ameyaomba makampuni na mashirika, watu wenye uwezo wa kifedha wasaidie walemavu wa viungo kuwapa mitaji kuwainua kiuchumi ili waachane na mambo ya ombaomba pamoja na kuwapa ajira.

Ameongeza kuwa watu wenye ulemavu wanapitia changamoto nyingi wengine wanatengwa na kunyanyapaliwa na familia zao huku baadhi wakitamani kwenda kanisani kuabudu lakini wanashindwa kwakuwa hawana watu wa kuwapeleka kanisani.

“ Wapo wanaotamani kwenda kanisani wakiwemo vipofu, viwete lakini wanashindwa kwakuwa hakuna wa kuwatoa majumbani kwao na kuwapeleka kanisani.

Walemavu wa mikono, vipofu wanakosa mtu wa kuwafanyia usafi, kuwafulia nguo zao, hawana magodoro na vyandarua wanaishi maisha magumu sana “ amesema Bhoke.

Amewaomba wazazi na jamii kwa ujumla kutowatenga walemavu na badala yake wawasaidie mahitaji yao huku akiwapongeza wazazi wake,kaka zake na wadogo zake kwa kutomtenga ambao wamekuwa ni tumaini na msaada katika maisha yake.

Amewatia moyo watu wenye ulemavu kujikubali na kujisimamia na kwamba wasitumie muda mwingi kuomboleza, kulia na kukata tamaa kutokana na hali zao na badala yake wamsifu Mungu ndiye tumaini lao huku akisoma maandiko matakatifu ya biblia kitabu cha Mathayo 9:1-3, Mathayo 15:30-31, Luka 4:17-18 , Mathayo 25 :35-36, Yohana 14, 1-3.

Mwenyekiti wa Chama cha Wasioona wilaya ya Tarime Mseti Mwita ameuomba uongozi wa jimbo kutafsiri vitabu mbalimbali na masomo ya kujifunza biblia (Lesoni) kwa maandishi ya Nukta Nundu ili kuwezesha wasioona kujifunza maandiko kwani masomo ya lesoni yametafsiriwa kwa lugha ya kingereza tu ambapo wasioona wengi hawafahamu kingereza.

Mwenyekiti wa Chama cha wasioona mkoa wa Mara Nyamlanda Lwakatale amesisitiza wazazi na jamii kuhakikisha watu wenye ulemavu wa viungo wanapata haki ya elimu ili iweze kuwa mkombozi wa maisha yao.

Mwenyekiti wa Shirikisho la vyama vya watu wenye ulemavu wilaya ya Bunda, Mwl.Wilbrod Msumange amesema kuwa yeye ni mtaalamu wa kubadili maandishi katika lugha ya kingereza na kiswahili kuwa maandishi ya nukuta nundu na kuwaomba viongozi wa kiadvetista Jimbo la Mara kushirikiana ili viandaliwe vitabu vya maandishi ya Nukta Nundu.

Askofu wa Kanisa la Waadventista Wasabato Jimbo kuu la Mara, Joseph Matongo amevutiwa na ibada iliyoendeshwa na watu wenye ulemavu wa viungo na kusema jambo hilo ni la kihistoria na kupongeza wote waliotoa fedha zao kufanikisha mahubiri yanayoendeshwa na watu wenye ulemavu.

“Kwakweli nimevutiwa na programu iliyoendeshwa na watu wenye ulemavu wa viungo,ndio mara yangu ya kwanza kuona watu wenye ulemavu wa viungo wakiungana na kufanya mahubiri yanayosimamiwa na wao wenyewe.

“Nampongeza Bhoke haoni lakini amekuwa na maono ya kufanya mahubiri ya walemavu na akatafuta wafadhili ambao wamewezesha fedha kufanikisha mahubiri. Mtu wa kuhurumiwa duniani ni yule ana macho ya kuona ila hana maono” amesema askofu Joseph.

Amewapongeza wafadhili na washiriki waliotoa fedha kuunga mkono mahubiri huku akiahidi kuwa uongozi umepokea maoni ya watu wenye ulemavu wa viungo na kuahidi kuzitatua .

Askofu huyo amesema kuwa watashirikiana na mwenyekiti wa shirikisho la vyama vya watu wenye ulemavu ili vichapishwe vitabu vya maandishi ya Nukta Nundu Pamoja na kuanzisha makambi ya watu wenye ulemavu jimbo la Mara.

Katibu mkuu wa jimbo la Mara, Benjamini Ngarama amesema ni mara yake ya kwanza kuona ibada kuu ikiendeshwa na watu wa mahitaji maalum na imemvutia huku akimpongeza Bhoke kwa wazo lake la kuanzisha mahubiri ya watu wenye ulemavu huku Mhazini mkuu wa Jimbo la Mara, Padon Kikiwa akiwapongeza watu wenye ulemavu kwa kuendesha ibada nzuri iliyowavutia wengi.

Mbali na ibada kuu iliyoendeshwa na watu wenye ulemavu pia wanaendesha mahubiri kwa wiki tatu yaliyoanza Agasti, 4, 2024 hadi Agasti 24, mwaka huu ili kuongoa roho ambapo mnenaji mkuu ni Mwijilisti Richard Kasagara.

Mahubiri hayo  yamefadhiliwa na Charles Mseti, Joshua Mrimi ambao ni wakazi wa Dar es Salaam waliotoa Milioni 10 ambapo washiriki kanisa la Nyamongo kati wamewaunga mkono kwa kuchangia Tsh. Miilioni 5. Vilevile uongozi wa jimbo la Mara umevutiwa na mahubiri hayo nakuchangia Tsh. 500,000 kufanikisha mahubiri.