SWAHILI INTERNATIONAL TOURISM EXPO KUFANYIKA OKTOBA

Na Andrew Charle , Dar es Salaam 

ONESHO la Nane la Swahili International Tourism Expo (S!TE) linatarajiwa kufanyika Oktoba 11 hadi 13, 2024 Dar es Salaam katika ukumbi wa Mlimani City.

Kwa mujibu wa mkurugenzi mkuu wa Bodi ya Utalii Tanzania (TTB), Ephraim Balozi Mafuru, amesema mwaka huu litakuwa la kipekee na lenye hadhi ya juu kutokana na maandalizi yake, huku akisisitiza umuhimu wa onyesho hilo ni katika kuimarisha sekta ya utalii nchini.

Hayo yameelezwa mbele ya waandishi wa habari , Septemba 12, 2024, katika makao makuu ya TTB, jengo la Utalii House jijini Dar es Salaam.

Mafuru amesema kuwa onyesho hilo linaloingia mwaka wake wa nane, limeendelea kuwa jukwaa muhimu la kuleta pamoja wadau wa ndani na nje ya nchi kutangaza fursa za uwekezaji na vivutio vya utalii vya Tanzania.

Ameeleza kuwa mwaka huu, onyesho hilo litafanyika kati ya Oktoba 11 hadi 13, 2024, katika ukumbi wa Mlimani City, ambapo wadau mbalimbali kutoka katika mnyororo wa thamani wa sekta ya utalii watashiriki.

Lengo kuu la onyesho hilo ni kuonyesha vivutio vya utalii na kuchambua fursa zilizopo ili kusaidia kukuza sekta hiyo.

“Onyesho la mwaka huu lina malengo mahususi ya kuwaleta pamoja wadau wa ndani na nje ya nchi ili kuona jinsi ya kuzitumia fursa za utalii zilizopo" amesema.

Pia tutakuwa na mikutano na semina za masoko na uwekezaji ambapo wataalamu watatoa mafunzo kwa wadau jinsi ya kuboresha huduma zao na kujitangaza kimataifa,” amesema. Mafuru.

Mafuru ameendelea kueleza kuwa nchi jirani na za Afrika ni washirika muhimu katika sekta ya utalii, na wamealikwa kushiriki kwenye onyesho hilo. 

“Washiriki watajifunza jinsi ya kutumia fursa za utalii, kuzitangaza bidhaa zao, na kufahamu matarajio ya wateja wa kimataifa. 

Ni muhimu kwa watoa huduma za utalii nchini kujua namna bora ya kutangaza bidhaa zao, kama vile hoteli na vivutio, ili viweze kuvutia soko la kimataifa,” ameongeza.

Mafuru amesema onyesho hilo pia litaleta fursa za kuimarisha uhusiano wa kibiashara kati ya waendeshaji wa utalii wa Tanzania na wale wa kimataifa.

Amesisitiza kuwa mikutano ya kibiashara itakayofanyika itasaidia kujenga mtandao wa kiuchumi na kuboresha huduma zinazotolewa ili ziweze kukidhi matarajio ya masoko ya nje.

“Onyesho hili pia litasaidia waendeshaji wa utalii wa ndani kuungana na wenzao kutoka nje, hasa kuhusu masoko kama vile Ulaya. Kupitia majadiliano ya moja kwa moja, watapata fursa ya kujifunza mahitaji ya soko hilo, ikiwemo aina ya vifungashio na huduma zinazohitajika,” ameeleza Mafuru.

Ameongeza kuwa bodi ya utalii imekuwa ikifanya kazi kwa karibu na mabalozi wa Tanzania duniani kote ili kuvutia watalii.

Amepongeza juhudi za balozi wa Tanzania nchini Brazili kwa kuleta kundi kubwa la watalii kushuhudia vivutio vya Tanzania.

Pia ametaja hatua za kuhusisha waandishi wa habari wa ndani katika mikutano ya utalii, kama walivyofanya hivi karibuni katika hifadhi ya Mikumi, ili kuwapa uzoefu wa moja kwa moja na kuwajengea uelewa wa masuala ya utalii.

Mafuru amesisitiza umuhimu wa wadau wa ndani kuunga mkono jitihada za serikali, hususan zile zilizofanywa na Rais Samia Suluhu Hassan kupitia filamu ya Royal Tour, ambayo imefungua milango ya utalii na kuonyesha fursa zilizopo nchini.

“Kazi yetu sasa, kama wadau wa sekta ya utalii, ni kuhakikisha tunatumia fursa hizi kupanua wigo wa mazao ya utalii, kukuza biashara zetu, na kuchangia katika maendeleo ya taifa,” amesema Mafuru.