SHAIRI : SALAMU ZA MWAKA MPYA

NIANZE na shukrani, kwa Mola wetu Karima

Kututia uzimani, kwa pumzi yake kuhema

Mwaka umetamatani, nasi bado tuwazima

Salamu za mwaka mpya, nawasalimu wapendwa

Nasalimu visiwani, bara siwaachi nyuma

Nawasalimu wandani, marijali wakuhema

Binda ninazisaini, zifike kwenu mapema

Salamu za mwaka mpya, nawasalimu wapendwa

Ni mapito duniani, wengine wameihama

Anatupenda Manani, pumzi haijasimama

Sisi tumlipe nini, ibada zije simama

Salamu za mwaka mpya, nawasalimu wapendwa

Changamoto mitihani, twashukuru kwa uzima

Ni mapito duniani, mwanadamu uwe mwema

Ukipata hamsini, uushukuru uzima

Salamu za mwaka mpya, nawasalimu wapendwa

Tupendane duniani,tusipeane lawama

Akikujia jirani,kwa jambo lime mkwama

Msaada ndio dini,sio kumpa kilema

Salamu za mwaka mpya, nawasalimu wapendwa

Tuombe ishilini tano, uwe mwaka wa neema

Tuzidishe mapambano, kazi iweze simama

Maisha yawe manono, tusiwe wenye kukwama

Salamu za mwaka mpya, nawasalimu wapendwa

Nimefika tamatini, uwe mwaka wa salama

Tumuombeni manani, tumalize kwa salama

Mabaya tusitamani, utu tukaja uzima

Salamu za mwaka mpya, nawasalimu wapendwa

Shairi limetungwa na Shomari Binda( Mvubula Vinongo) 0755487117/0672687117