KARIBU UKWENI

WAKARIBISHWA ukweni, karibu wetu mgeni

Usijutie moyoni, hapa ni kwenu nyumbani

Utaishi kwa amani, bila shaka maishani

Karibu bibi harusi anapotokea mume

Wakwe wako wakarimu,   pamoja na wifi zako

Kuwaheshimu muhimu, usiwe na chokochoko

Zingatia na nidhamu, usiwe kivyako vyako

Karibu bibi harusi anapotokea mume

Wakwe wako wathamini, wajali toka moyoni

Usiwe na kisirani, isimamie na dini,

Yaache ya mtaani, yaepuke kwa yakini,

Karibu bibi harusi anapotokea mume

Uchoyo usitamani, chakula kuficha ndani

Nakupa yangu maoni, yazingatie moyoni

Na kidogo kithamini, vya gharama sitamani,

Karibu bibi harusi anapotokea mume

Tano ni wa ukingoni, karibu sana ukweni

Sisi tutakuthamini, tutakutunza mwandani,

Tunakupenda jamani, tumekuweka moyoni,

Karibu bibi harusi anapotokea mume

Mtunzi ni Sirdody - Kilimanjaro,0762396923 au 0675654955